你對奢侈品有幾多認識？有無諗過點樣喺奢侈品做投資？近兩年可以話係投資者嘅天堂，唔少朋友喺股市或幣市獲得豐厚回報。當本金變大，點樣做好分散風險投資就變得越嚟越重要。港究專員會同大家深入淺出探討奢侈品投資嘅價值，以及可能值得你投放資金嘅方向。
即刻睇：
紅酒投資歷年回報
紅酒除咗用嚟飲，其實用嚟投資一樣有唔錯嘅回報。喺過去15年，英國紅酒指數 (Liv-ex Fine Wine 1000) 總回報率錄得 240%，而根據Knight Frank 嘅Knight Frank Luxury Investment Index(KFII)，全球紅酒嘅投資價值喺過去10年亦都增長咗127%，去年即使疫情阻礙咗運輸同交易，紅酒價格仍然錄得+13%升幅。紅酒投資回報雖然未算特別標青，不過就提供咗另一種穩健嘅投資項目畀投資者。而且，紅酒係消費品，唔少投資者都會以投資紅酒嚟管理稅項。
紅酒分級制度
要投資紅酒，並唔係單單落樓下超市掃貨就得。值得投資嘅紅酒稱為「列級酒」，唔少紅酒投資者會以酒莊嘅發展史、紅酒生產年份同國際市場拍賣價格等作參考。以法國波爾多 (Bordeaux) 及勃艮第 (Bourgogne) 嘅分級制度為例，波爾多嘅分級制度由一級分至五級，酒標上有大字突出酒莊名；而勃艮第就以酒莊土地分級，無論係大莊定係細莊，只要酒莊擁有一塊列級酒田，就可以將自家出品列為「列級酒」，所以勃艮第紅酒嘅酒標一般會以大字突出酒田源地。波爾多 (Bordeaux) 及勃艮第 (Bourgogne) 係紅酒投資市場嘅主軸，可以視為紅酒界主要投資嘅target。
投資紅酒注意事項
個人投資者要投資紅酒當然唔係單單睇以上幾行字就做到，要投資紅酒，投資者需先了解可能存在嘅風險。投資紅酒主要有幾個風險：
第一、紅酒定價存在極大主觀性。紅酒市場並唔似股票咁流通，每一支酒嘅價錢往往係由有興趣嘅極少數人去定價。要靚價買到好酒，研究種植地點、樹齡、土壤及樹藤等等功課一律走唔甩。如果投資者對紅酒認識唔深，一唔小心入錯貨可能有排捱價。
第二，紅酒由種植葡萄至發酵過程存在好多不確定因素。如酒莊所在地該年天氣差，喺陰天及寒冷嘅天氣下出產嘅葡萄質素普遍會麻麻，用呢批葡萄生產嘅紅酒亦會較淡口；全球暖化亦都令法國葡萄收成期大為推前，對紅酒產業帶來衝擊。
第三、國家政策會左右投資品嘅價值。紅酒價格於2009年至2011年錄得瘋狂升幅。當年紅酒頗受內地市場追捧，部分人買酒以價錢行先，一餐飯開幾支五六位數嘅紅酒都係等閒事。不過，其後政府積極打貪，內地投資者對奢侈品避之則吉。紅酒價格於2011至2015年一度大幅回落五成。大起大落，並唔係只會發生喺股市同幣市。
如何投資紅酒
未講點投資已經咁多嘢要考慮，呢筆錢係唔係普通人賺唔到？呢個問題困擾過唔少有興趣投資紅酒嘅朋友﹐而答案係否定嘅。除咗直接買紅酒，現時投資市場都有唔少產品可以畀投資者入場，即刻一齊睇吓可以點樣玩：
期酒
比起直接買酒返屋企擺，買期酒 (En Primeur) 就簡單得多，以規模最大嘅波爾多期酒作為例子：每年酒莊喺九月下旬收割完葡萄後，經過精釀、放橡木桶陳年等多重工驟後，紅酒會喺兩年後推出市場。而葡萄收割嘅年份，就係我哋平時講嘅紅酒年份。雖然酒莊會將紅酒推出市面，不過同一批橡木桶嘅紅酒就會以期酒嘅形式出售。如果係好酒，啱啱開賣嘅期酒價格好大可能係該批紅酒嘅歷史低位。唔少紅酒投資者都會喺呢個時候大手買入期酒，然後坐等收益。
而酒花一般會喺每年4月開始公開發售，投資者可以喺官網或各大酒商訂購。成功購入酒花後，要再等兩年等紅酒釀成，買家收到電郵後同酒商確認處理手續，酒商就可以直接發貨至買家指定嘅酒庫，又或者直接喺酒商平台上轉售酒花，轉售佣金一般約5至10%。
紅酒股票
除咗期貨，當然唔少得股票。遺憾地，目前並無好似Liv-ex Fine Wine 1000咁追蹤紅酒價格嘅ETF，最類似嘅ETF 可以睇 consumer discretionary 類嘅 XLY (YTD ~13%) 或者VCR (YTD ~16%)。
雖然紅酒ETF 依家未有，但「紅酒概念股」就值得留意下：Willamette Valley Vineyards (美股股票代號WVVI) 係一間美國葡萄酒生產商。WVVI成立約30年，擁有約一千英畝酒田，主力生產美國製造紅白酒。公司過去營收每年大約10%穩定成長。WVVI股價YTD有接近100%升幅，回報十分可觀。
唔想淨係投資紅酒公司股票嘅話，亦都可以揀集團式經營Beverage 類生意嘅上市公司投資。最為人熟悉嘅有Diageo (股票代號DGO) 或者 Constellation Brands (股票代號STZ)，雖然呢啲公司業務廣泛，不過投資呢類型股票必需有耐性同埋對回報有合理期望。
奢侈品投資聽落好似唔關普通人事，其實實際操作卻比想像中簡單。你對自己眼光有無信心？有嘅仲唔即刻開始自己嘅奢侈品投資之旅！
鐘意呢篇分享嘅話希望大家畀Like支持下我哋，Subscribe或者Bookmark我哋就可以即時收到更多優惠資訊 / 介紹，有咩問題歡迎留Comments！ 如果想分享 / 更快收到各種優惠著數，歡迎加入我哋港究Telegram討論區。
最新消息，我哋最近仲新增咗多個Kong’s Cult 最新文章Telegram Channel，只要Join Channel，每逢有新文章出爐就會同步收到，勁方便！！唔好漏咗Follow Kong’s Cult嘅 Facebook同Instagram專頁啊！你哋嘅支持同意見絕對係我哋港究專員繼續發掘著數嘅動力，下次見！
