穩陣、可持續、唔洗點理都有息收，呢啲一直都係大部份港人投資嘅目標。宏觀展望2021年，雖然整體經濟獲各大行一致唱好，但自己操刀炒股始終未必係大部份港人嘅首選，即使有心落場試下身手，手持資金擺一部份喺穩陣收息股當保本亦都唔係一件壞事。2021年啱啱開始，港究專員即刻同你一齊睇7隻精選收息港股，助你2021 投資順利！
港究專員揀高息股嘅準則有幾點：1)市值大、2)年資高、3)派息穩定。市場上要搵高息股並不困難，不過若果不幸揀咗股價極為波動嘅，隨時本金都保唔住。所以，港究希望帶畀讀者嘅都係名堂響、大家一聽就識嘅藍籌股票。長期投資最重要嘅就係信念，如果信念唔夠，股價上落少少已經走都走唔切，咁又點樣坐得安樂呢！
股票代號 | 股票名稱 | 每手股數 | 年息率 | 每手金額HKD約數 (以2021年1月中股價計算) |
2638 | 港燈 | 500 | 4.18% | 3,830 |
2 | 中電 | 500 | 4.29% | 35,900 |
3 | 煤氣 | 1,000 | 3.1% | 11,280 |
1038 | 長江基建 | 500 | 5.73% | 21,450 |
1686 | 新意網 | 1,000 | 2.46% | 7,100 |
388 | 港交所 | 100 | 1.46％ | 45,840 |
345 | 維他奶 | 2,000 | 1.01% | 63,800 |
中電 (2)、港燈 (2638)、煤氣 (3)：傳統派息公用股
受疫情影響，傳統公用收息股穩如煤氣、港燈及中電通通一律難逃厄運。原因不難理解：無論係在商或者在私人生活而言，水電煤呢啲可控性支出一定係第一時間「慳得就慳」，如果係呢幾隻公用股嘅長期fans，「賺息蝕價」當然唔好受，不過每隻股票都會受周期輪動影響，長遠而言呢幾隻股票都仲係十分穩陣；如果係今年開始想收多啲息嘅朋友，就有機會賺息之餘賺埋價差，記得多啲留意啦！
長江基建(1038)
近年大力收購英國優質資產嘅長江基建一直受脫歐及英國疫情反覆影響，股價表現低迷。不過喺派息方面，長江基建就一直交足功課，絕無扭擰。長遠而言，香港移民潮已成趨勢，英國亦都係港人首選移民地之一。如果睇好英國經濟前景，派息吸引嘅長江基建就值得好好留意入手時機。
新意網 (1686)
有行業受疫情重創，亦都有行業受惠於疫情 – 數據中心營運公司就係屬於後者。新意網作為全港最大數據中心營運公司，息率雖然無九倉置業 (1997) 咁高，但勝在資產於未來科網年代越嚟越有價值，有興趣嘅讀者記得放入自己嘅watchlist！
港交所 (388)
美市近排對中概股頻頻出手，雖然新總統隨即上台，但唔少中概股已經做好在港二次上市嘅準備。中概股回流上市，負責集資交易嘅港交所自然成為直接得益者，雖然息率低，但同樣比揸實際物業資產嘅其他性質公司更為穩定。
維他奶 (345)
要做起一個品牌絕對唔容易，但一旦做得起，品牌效應嘅回報就十分可觀。維他奶紮根香港，近年喺內地市場亦都勢頭十足。雖然息率唔及其他推介股咁高，但睇好2021 港股係牛市嘅話就千祈唔好錯過佢！
鐘意呢篇分享嘅話希望大家畀Like支持下我哋，Subscribe或者Bookmark我哋就可以即時收到更多優惠資訊 / 介紹，有咩問題歡迎留Comments！ 如果想分享 / 更快收到各種優惠著數，歡迎加入我哋港究Telegram討論區。最新消息，我哋最近仲新增咗多個Kong’s Cult 最新文章Telegram Channel，只要Join Channel，每逢有新文章出爐就會同步收到，勁方便！！唔好漏咗Follow Kong’s Cult嘅 Facebook同Instagram專頁啊！你哋嘅支持同意見絕對係我哋港究專員繼續發掘著數嘅動力，下次見！
