傳送門 － 即刻帶你睇：
喺香港呢個競爭大、生活節奏快嘅地方，絕對需要從唔同渠道累積財富先可以行先其他人一步。而買賣股票就係其中一個任何人都可以參與而又可以小博大嘅渠道。
但咁多券商，上網搵資料又各有各好咁，投資者點先搵到一個適合自己嘅券商平台？港究專員為唔同水平嘅投資者以平台功能、費用及資產保障三方面從數十券商中搵出可能最適合你嘅券商！
老手首選 － 盈富證券Interactive Brokers Group, Inc
萬能券商
唔少港人有豐富嘅投資港股經驗，但見到美市日日都有行情就想試下轉玩美股。咁揀邊個券商好？以網上券商而言，盈富證券相信係好多投資人，甚至係小型對沖基金嘅不二之選，盈富證券提供嘅服務絕對係包羅萬有，只要開設一個帳戶，就可以投資全球大部份市場及金融產品。
據網站資料，只要擁有一個帳戶，用戶就可以對全球135 個市場，33個國家以及23種貨幣進行交易，便利性絕對驚人！IB嘅每筆交易佣金 (Commission) 可低至USD1。講到要以小博大，最值得留意可能就係IB嘅超低息孖展，即係保證金貸款利率 (Margin rates)。以USD10,000戶口計算，保證金貸款利率可以低至1.58%按日利息，絕對傲視同行！(有關保證金貸款利率的詳細可以喺呢度查看)。
資產保障
資產保障方面，IB母公司嘅營運係非常穩健，倒閉風險好低，但都有啲細節要留意返：IB為美國上市公司 (代號 IBKR)，受SEC (美國證券交易監督委員會)、FINRA (金融行業規範權威)、NYSE (紐約股票交易所) 和世界其他監管機構的監管。
不過，香港投資者需要喺IB HK 開設帳戶，其存款戶口不受美國證券投資人保護公司(SIPC)的USD500,000保障，而只受香港投資者賠償基金的HKD300,000保障（相關保障僅適用於港交所的證券與期貨產品，即不包括美股及戶口現金）。簡單咁講，即係用IB係唔會減低部份投資者對資產保障嘅顧慮。如果你想對自己資產有更多保障，請往下閱讀穩定之選。
適合有經驗投資者
IB功能強大，無論係普通交易，算法交易 (Algorithmic trading) 又或者係超短線交易 (Day Trading)，IB都有提供相關服務。不過，由於其功能強大，普通投資者可能需要花多啲時間適應佢嘅使用介面。另外，除咗基本USD10月費外，要係喺IB check取得實時股票數據係需要另外收費。總括而言，IB會係比較適合有一定經驗嘅投資者使用。
Quick Take
－ 帳戶可對全球大部份市場及金融產品進行交易
－ 提供超低佣金及保證金貸款利率服務
－ 母公司長期持有充足現金流及受多個機構監管，公司倒閉風險低；但需留意香港分公司對資產保護的風險
－ 需要時間學習及適應使用界面
－ 有基本USD10月費要求，需額外購買數據包查看實時數據
穩陣之選 － 德美利證券 TD Ameritrade
對好多讀者黎講，投資美股係希望長期投資一個成熟穩定嘅市場。如果投資嗰果陣要考慮投資產品嘅風險又要考慮埋啲資產會唔會無咗，可能即刻令唔少讀者卻步。港究專員絕對明白大家嘅concern。想搵到一間功能強大，界面易用而又充分保障到資產嘅券商究竟有無可能？跟住落嚟黎介紹嘅德美利證券 TD Ameritrade (TD) 可能就係最適合追求功能全面又安全穩定嘅讀者。
資產保障度高
TD為美國上市公司 (代號AMTD)，佢嘅香港網頁清楚表明佢係證券投資者保護公司 (“SIPC”) 嘅成員。如果券商經營出現問題，證券客戶係SIPC嘅保障下係可以獲得最高USD500,000 的索賠 (包括USD250,000現金索賠)。對於重視資產安全嘅投資者，SIPC 基本上就係一粒定心丸。另外，TD對近年令投資者相當擔心嘅非授權交易 (絕大部份源於黑客入侵或網絡攻擊) 都有提供保障。喺資金安全性方面，TD 嘅保障係非常高。
功能強大 / 有教育資源
TD 嘅交易平台thinkorswim無論係電腦或手機程式都係簡單易用之餘又功能齊全，亦會提供實時數據，大受投資者好評。另一方面，投資者，由其係無接觸過股票嘅新手，初次踏足美股市場時可能對各式各樣嘅交易指標以及資訊搞到眼花繚亂，無從入手。想有系統地學習交易方法及各種工具嘅利弊同時進行交易，TD 就可以滿足到你嘅需要。TD擁有系統化及充足嘅教育資源可以供投資者學習。如果對股票證券買賣或交易指標想有更多認識，TD 絕對係一個好幫手。
雖然TD喺功能及資產保障上都十分出色，但佢喺佣金方面嘅收費對比其他券商就無咁大優勢。同IB一樣，TD喺香港係有分公司TD Ameritrade Hong Kong Ltd (TD HK)，港人需要喺TD HK進行交易。依家喺TD HK 買賣股票每筆交易佣金為USD6.95 (有關期權 / 期貨或其他收費可以撳呢度了解多啲)，對比起IB 低至USD1 嘅佣金收費，頻密交易嚟講所需佣金係可以有好大差距。不過，其實國際版已經免咗佣一段時間，TD HK喺將來係有機會跟隨國際版改革收費機制。加上如果係長期投資者，買入一次之後可能好耐先有下一個動作 (目前TD HK喺度做緊優惠，新用戶最高可以獲得100次免佣交易，詳情撳呢度了解多啲)。所以，TD HK對於追求穩定回報嘅投資者依然相當有吸引力。
Quick Take
－ TD HK受SIPC保障
－ TD交易平台功能強大，簡單易用
－ TD 整體收費比其他券商高
新手上路 － 富途證券
喺2012 年成立嘅富途證券去到上年年底已經有70萬人開戶，係香港熱門券商之一。富途成功嘅原因好簡單：交易平台功能齊全，免佣 / 低佣，開戶簡單，而且有騰訊投資…相信以上好多資料，大家無親身用過，都可能聽身邊嘅用戶朋友講過。之所以話富途係適合新手，港究專員會由以下幾點娓娓道來。
介面易用
富途嘅睇盤功能係非常出色，使用介面亦十分user-friendly。基本上喺富途開咗戶口之後，用戶就可以即刻睇到實時股票走勢，無論係基本面嘅公司資料、新聞、財報，技術面嘅各個指標又或者係資金流分佈，富途都一一有齊。即係話，無論用戶係打算用咩方法去買股票都好，富途都可以提供到大部份需要嘅資訊。同好多有實力有野心嘅公司一樣，富途十分注重創立一個完整嘅使用生態圈：富途設有討論區提供畀用戶之間作交流。討論嘅話題可以廣而深，亦有唔少熱心人士提供各種投資嘅教學，只可以話睇到你唔想睇都仲有。當然，網上嘅資料可唔可信，係需要用戶獨立思考嘅。
低佣金
富途嘅佣金並唔係最抵，但可以話係一個合理嘅水平。有別於其他卷商，富途嘅收費係佣金+平台費嘅收費模式 (當然仲有由美國證監會等機構劃一收取嘅費用，不過所有券商都有，在此不贅)。換言之，即使用戶透過限時活動成為免佣用家，用戶係依然需要畀平台費 (有關平台費及其他收費詳情可以撳呢度了解多啲)。呢種收費方法係富途獨有嘅…有人可能會覺得咁樣同富途聲稱嘅一世免佣有出入。不過，富途提供嘅資訊服務比大部份同樣收費水平嘅券商都更穩定同齊全，港究專員認為對投資新手嚟講，一個穩定同容易上手嘅系統會比有限嘅交易費黎得緊要。當然，自己親自用下就最實際！富途嘅軟件只需要簡單註冊戶口就用得，港究專員推薦新手們直接試用下，可能會慳返好多時間再去搵有咩其他券商抵。
使用槓桿 / 沽空要留意
富途嘅貸款利率計算並唔算特別低，槓桿可做嘅倍數亦都有限。富途依家嘅貸款利率係年化4.8%，最高2倍槓桿 (有關收費詳情可以撳呢度了解多啲)。舉個例子，如果閣下戶口有本金USD10,000，你可以借嘅上限就係USD10,000，借足一年之後要還USD10,480，利息係USD480。對比起本地銀行或者大部份券商，4.8%係合理水平。但如果同上面IB嘅1.58%比較，都有大約3倍嘅差異喺度。港究專員認為岩岩開始學玩美股並唔需要為呢方面考慮太多。因為槓桿嘅作用就係放大鏡：出色嘅決定會令你獲得更多財富；錯誤嘅決定就可能令你有更嚴重嘅損失…如果新手太容易可以用高槓桿做買賣，放大咗嘅 Profit and Loss 可能會令人染上賭癮，咁喺投資路上係非常不利既。所以，港究專員認為牛牛嘅貸款利率某程度上對新手黎講並唔係壞事。當然，到技術純熟之後，就可能需要搵其他提供高槓桿嘅券商加速財富累積嘅速度。
Quick Take
－ 富途容易上手，功能齊全
－ 免佣帳號亦有額外收費
－ 唔係最適合做槓桿既券商
剩係想要個戶口買賣？即睇【離岸股票戶口】Firstrade – 0佣金 0平台費！3分鐘簡易開戶教學！
鐘意呢篇分享嘅話希望大家畀Like支持下我哋，Subscribe或者Bookmark我哋就可以即時收到更多優惠資訊 / 介紹，有咩問題歡迎留Comments！ 如果想分享 / 更快收到各種優惠著數，歡迎加入我哋港究Telegram討論區。仲有唔好漏咗Follow Kong’s Cult嘅Facebook專頁同Instagram專頁啊，你哋嘅支持同意見絕對係我哋港究專員繼續發掘著數嘅動力，下次見！
