有人食極唔肥，但亦都有人飲水都肥！根據衛生署統計，如果以體重指數(BMI)嚟計算，喺香港嘅15－84 歲人士中， 有29.9% 人士 (女性24.4%，男性36.0%) 屬於肥胖，而屬於超重嘅人士有 20.1% (女性為19.3%，男性為20.9%)！最常見肥胖群組係65－84歲女性 (34.3%) 同埋 45－54 歲男性 (51.1%)。雖然閣下未必係常見肥胖組別，不過都市人生活模式增加肥胖機會亦係不爭嘅事實。以下落嚟港究專員即刻同你睇吓點解我哋咁易變肥，又有咩方法輕鬆減肥！
即刻睇...
原因
基因影響
人體基因對體重影響十分大，我哋食幾多吸收幾多都會受到家族遺傳影響。撇除受疾病影響因素，每個人身體都有一個自己認為合適嘅重量—呢個重量並唔係講緊我哋理想嘅磅數，而係「身體」自己認為合適嘅磅數。當身體意識到我哋超過應有嘅磅數，佢就會自然對節食同埋運動有更快嘅反應，減低增重對我地健康可能造成嘅威脅；相反，如果身體覺得我哋嘅飲食習慣無問題，所有減肥工作都會變得事倍功半。所以，減唔到肥，有時唔係自己無做嘢，而係身體唔認為有咁嘅需要。
想知自己係咩體格？即看圖解「體」！
身邊有朋友食極都唔肥？會唔會佢唔知道呢啲嘢？
新陳代謝慢
新陳代謝慢亦都係令唔少減肥人士吃盡苦頭嘅身體機制。身體對新陳代謝嘅需要十分人性化。當身體認為某個器官部位係維持生命不可或缺嘅一部份之後，其他不必要嘅「營養開支」，例如頭髮，肌肉，皮膚，指甲等等，都會喺吸收營養少咗嗰陣被「cut budget」減慢生長及更新速度。所以，港究專員見過唔少減肥人士出盡九牛二虎之力，反而落得脫髮、肌肉鬆弛及皮膚暗啞出皺紋等下場！愈努力節食運動，喺收入少開支大嘅情況下，身體反而愈覺得有必要抵抗嚟維持返正常運作。肌肉亦都生長唔到去取代脂肪，再做咩修身工程，身體都係唔聽話……
計錯數
Output > Input = 減磅，呢條公程式相信唔少減肥人士都聽過，只要食落肚嘅熱量比消耗嘅熱量少，體重就理應一直減少。要計算身體所需消耗熱量，TDEE 係為人常用嘅公式。不過，其實我哋嘅體內系統會不斷因為我地嘅生活習慣一直變化，所以即使TDEE亦都未必可以準確計算到我哋身體真正所需嘅熱量。一個較為簡單嘅民間智慧係： 如果你兩星期跟TDEE精準控制熱量吸收但係體重都無改變，你就知道自己好大機會需要再向下調TDEE嘅數字。但係咁又引伸咗另一個問題：過度節食。過分節食係指女性一日攝取少於1200卡路里或男性攝取少於1500卡路里，但又未到完全厭食 / 唔食嘅狀態。非病態性嘅過分節食會帶嚟兩個後果︰1) 反彈變重；2) 體重不變。
原因係，過分節食會令身體陷入入不敷支嘅飢荒狀態。喺有一餐無一餐嘅情況下，身體為咗維持基本機能唯有飢不擇食咁將你擺入口嘅一切完全吸收，包括junk food。當身體無條件接受所有垃圾物質之後，減肥難度立即倍升。
解決方法／推介
多食原型食物，少食碳水化合物 / 加工食物
原型食物係指少加工、接近食物原貌嘅食物，例如雞蛋、堅果、魚類等。越少人工添加成份嘅食物營養價值就越高，對身體負擔越少，而且通常容易啲有飽足感。減肥期間應盡量避免食加工食物。加工食物通常有一啲共同特色，就係快、靚、正。香港人生活節奏急促，唔少人都習慣咗肚餓又唔想郁果陣就搵即食類、翻叮類，或罐頭類等等過度加工嘅食品醫肚。加上大量吸收碳水化合物 (醣類)，如米飯、麵條，仲有大家最愛嘅珍珠奶茶等極高含醣量飲料，身體就會積聚過多葡萄糖從而容易轉化成脂肪。所以，減少吸收加工食物及碳水化合物絕對係減肥第一步！
善用輕斷食法
斷食法係指一日大部份時間除飲水外保持空腹而只於特定時段進食。斷食法嘅用意係將身體內嘅葡萄糖與肝醣完全消耗，盡量提高體內能量及脂肪嘅運用。由於坊間有大量不同空飽腹比例嘅斷食法，減肥人士可以先由較輕鬆嘅「16:8輕斷食法」入手 (一日中16小時保持空腹，期間可以飲水；進食則於剩下8小時內完成)。輕斷食法係較易做到嘅減肥方法，當然，適量運動及充足睡眠都係必需嘅。港究專員必須提醒一句，雖然斷食法飽受好評，但每個人身體狀況都唔同，斷食法涉及短期耗盡能量嘅做法，過份使用好大機會會造成身體不適。使用斷食法時緊記時刻留意身體狀況！
運動
要抽時間做運動真係好難！好在除咗一般帶氧運動之外，我哋仲有HIIT及其他高強度運動可以令我哋身體短時間內燃燒大量卡路里。HIIT (高強度間歇訓練) 係短時間內以「高強度運動」+「短暫休息」做循環訓練。除咗減脂，HIIT仲可以幫助保留、甚至增加肌肉質量。一般嚟講，做30分鐘左右HIIT 已經等於跑一個鐘步，燃燒大約500至600卡路里。
另外，跳繩及轉呼拉圈都係有效嘅消脂運動，以30分鐘運動量，期間心跳達個人心跳最大供率8成以上，兩者分別可以消耗400卡及200卡。得閒轉吓唔同運動可以為身體帶嚟多啲刺激，咁就唔洗成日覺得做一樣嘅嘢咁無聊啦！
要留意嘅係，過多嘅有氧運動有機會導致肌肉流失，而肌肉量係影響新陳代謝嘅一大要素，高基礎代謝率係減肥嘅關鍵。因此喺減肥期間除咗做有氧運動，都要做吓無氧運動！
最正宗方法：尋求營養師意見！
雖然網絡上有大量關於減肥嘅資訊，市面上亦都有大量減肥療程聲稱可以做到一勞永逸，但係咪每個人都適合就真係見仁見智。港究專員以上所講嘅方法亦都只係對大部份人都可能有效嘅方法，真正最有效及最推薦嘅方法始終都係尋求營養師意見。營養師唔單止會按照個人體質以專業知識及經驗去安排減肥方案，針對每餐膳食擬定合適餐單，仲會喺期間透過觀察體重、血壓等醫學數據作出適當方案調整，令減肥人士有tailor-made嘅減重天書。
最後，港究專員仲有一個小小嘅溫馨提示：無論閣下幾想盡快減肥都好，減走嘅磅數一星期最好唔好超過2磅。人體其實同一部機器差不多，每日都需要能量去維持運作。如果為咗減肥，每日吸收嘅能量大幅少於身體所需，身體好容易會因為唔夠能量而出問題。醫學界建議減肥宜慢不宜快，安全減肥速度大約為每星期減 1至 2磅，呢個速度減肥可以有效減走脂肪同時避免肌肉流失，而且慢速減肥容易令自己養成良好習慣，較容易維持並可達致長久擁有健康體魄。
你或者對以下產品有興趣……
鐘意呢篇分享嘅話希望大家畀Like支持下我哋，Subscribe或者Bookmark我哋就可以即時收到更多優惠資訊 / 介紹，有咩問題歡迎留Comments！
如果想分享 / 更快收到各種優惠著數，歡迎加入我哋港究Telegram討論區。最新消息，我哋最近仲新增咗多個Kong’s Cult 最新文章 Telegram Channel，只要Join Channel，每逢有新文章出爐就會同步收到，勁方便！！唔好漏咗Follow Kong’s Cult嘅Facebook同Instagram專頁啊！你哋嘅支持同意見絕對係我哋港究專員繼續發掘著數嘅動力，下次見！
