2020 Notebook Ownership Programme 又嚟喇！等港究專員同你一齊揀！(已完結)

基本嘅思路就係知道自己嘅用途之後選擇自己啱用嘅CPU、RAM、獨立顯示卡 (如果適用)，然後就可以篩選出5-10部唔同重量唔同牌子唔同儲存設備等等嘅手提電腦，港究專員以下都講多啲關於搵手提電腦嘅幾個要點。

• 諗清楚自己係咪真係需要一部手提電腦

如果你係鐘意手拎住支筆而唔係用keyboard打字嘅話，你可以考慮iPad、Galaxy Tab 或者一種類似Surface嘅 2-in-1 手提電腦。

• 認清楚你嘅預算係幾多

Budget係幾多真係好重要，手提電腦喺同一個價位會比桌上電腦效能會低大概20至40%，如果你嘅預算係掹掹緊，除非你係住hall 都留喺房打機 (呢個可能十分低)，或者經常要拎出街剪片同畫圖，不如買一部枱機 + 一部Tablet個價值同用途會仲好。

• 重量、效能、價格呢3個要素係有固定嘅比例

當重量輕、效能高，自然價格一定高，因為要用更多貴嘅物料嚟製造一部電腦
當重量高、效能低，自然價格一定較低

• 諗清楚自己有無需要拎出街

如果有需要拎出街嘅話，記得一定要睇吓部電腦嘅重量。一般嚟講，連埋差電嘅話，1.6kg已經係極限，再重嘅話已經會開始覺得有啲吃力。除非你係想買重度遊戲嘅手提電腦就當然另計。

• 產品嘅定位

如果一部電腦係定位為旗艦、商務，呢類電腦嘅價格一定會比同一樣配置同牌子嘅普通系列電腦更高。就以Dell 呢個品牌為例，Latitude係商務定位，XPS 係旗艦定位，而Inspiron為家用定位。今年 2020 Notebook Ownership Programme嘅 XPS 13 9300 同樣使用 CPU i7-1065G7、8GB RAM DDR4、512 GB TLC SSD ，而 Inspiron 5401 嘅mon 同獨立顯示卡都比 XPS 13 9300 強，但係 Inspiron 比 XPS 貴接近 40%。不過所謂「一分錢一分貨」，整體嚟講，旗艦同埋商務等級嘅電腦會比普通家用等級電腦耐用。但係喺依家嘅電子用品都有唔多唔少一定有瑕疵或者唔同程度嘅工藝誤差。就算你買XPS等等嘅頂級旗艦系列都唔代表一定保養期內唔會壞或者一過保養就壞。