無需許可借貸喺Crypto 世界入面並唔係新鮮事，只需持有主流幣如BTC、ETH 或者穩定幣，要喺Compound、Aave等DeFi借貸龍頭做借貨十分容易。但如果想將DOGE、SHIB呢類波動大又或者ENS、GTC呢類非一線貨幣嚟做借貸就並不容易。但呢類貨幣係咪完全無借貨需求？對於長期持幣者或者做空者，細幣借貨需求極大。而本文主角Euler，正正就為細幣市場創造更多可能性，為DeFi用家提供更多機會，以及進一步深化DeFi 市場結構。
Euler 背景
Euler Finance 係一個喺以太坊建立嘅開放式借貸協議，創辦人有三位：分別係曾經喺英國牛津大學做演化生物研究嘅 Michael Bentley；以及有豐富開發經驗嘅 Doug Hoyte 及 Jack Prior；此外，團隊顧問 Mick de Graaf 為以太坊鏈上去中心化資產管理平台 DEFIED.io 嘅共同創辦人，亦曾經喺鏈上指數基金 PieDAO 擔任首席開發者。
Euler 最大特色係所有使用者都可以喺Euler上架任意代幣進行借貸。只要資產喺Uniswap V3 上有 WETH 對，而市場又有需求，一律可借出借入。
點解要用Euler？
無許可借貸聽落好似好簡單，但實際運行就需要考慮唔同因素，例如因細幣波動率極高而出現嘅壞賬、貸款利率是否吸引以及平台係咪已提供足夠嘅清算誘因等等。解決以上難題當然係Euler 賣點，而Euler 比起Compund / Aave 喺用戶借貨方面就有四項創新：
無許可上市機制
用戶可自行添加任何喺 Uniswap v3 上有 WETH 交易對嘅資產喺 Euler 做借貸。
三層資產等級
按資產風險三層分級，減低壞賬及清倉風險
響應式利率
Euler 利用PID控制器提供響應式利率，減低用戶借貨成本過高或過低嘅問題。
抵押品保護
用戶可以只抵押資產而不借出。減低資產「被借出」再違約及對協議治理操控等風險。
以上創新背後由複雜嘅數式計算，有興趣了解可以按此詳細閱讀。但對於普通人，點解要用呢個平台？
借方
對借方而言，Euler 可以提供嘅最大優勢係減低借款利率波動及清倉風險。目前一線DeFi借貸平台主要係用靜態線性 / 分段線性方法計算借貸利率。簡單嚟講，就係按資產可能出現嘅市場需求設定唔同嘅利率參數。以ETH 借貸為例，如果平台資金池入面嘅借貸需求增加或供應減少時，ETH嘅借出利率就會上升，反之亦然。好似ETH 呢類流通性高嘅資產，平台有足夠嘅參考數據設定利率參數；但如果係一啲無咁流通嘅資產﹐資產嘅高波動率及難以預測嘅借貸需求會大大影響借貸成本，所以一般借貸平台都唔願意提供細幣借貸服務。但用咗PID 控制器嘅Euler就可以無需持續手動治理調整利率下控制利率，即時因應市場需求作出利率調整。作為借方，用Euler 唔單止可以借細幣，亦都唔需要擔心要支付唔合理嘅利率。
另外，三層資產分級機制減低用戶爆倉嘅風險。Euler 使用三級資產分級機制，定義如下 (詳細定義按此)：
- 隔離層級：可以用作單獨借貸，不可用作抵押
- 跨層級：可以用作跨資產借貸，不可用作抵押
- 抵押層級：可以用作跨資產借貸，可用作抵押
舉個例子：如果我手上有10,000粒USDC，如果SHIB 係隔離層資產而我又想借入，我只可以喺Euler 戶口A* 借入SHIB，唔可以再借其他幣；
如果GTC 同ENS 都係跨層資產，我就可以喺戶口A同時借入兩種幣，甚或更多跨層幣；而抵押層幣種，顧明思義，就係可以用嚟做抵押品嘅資產**。
*一個錢包地址可以喺Euler 上有256個分戶口
**用戶必須抵押資產先可以喺Euler 做借入動作
以上獨立分戶機制可以減低用戶因借入高風險幣種而被清倉嘅風險。試想像喺無分戶機制情況下，如果用戶同時借入SHIB 及ENS 而ENS突然爆升，用戶需要將兩個幣種同時清算，令原本因按預期下跌嘅SHIB亦變到無利可圖。有咗分戶機制，即使有咩瘋狂想法，例如上十個槓桿借入SHIB 做空等等，都可以盡情係分戶口做實驗。
槓桿當然唔少得用合約玩：
貸方 / 抵押方
抵押方可以因應自己需要選擇借唔借抵押品出去。喺一般DeFi借貸平台，只要係放咗入協議嘅抵押品就全部可以任人借。雖然借貸精神就係為咗增加唔同資產嘅流動性，但如果市場極度波動或者借方刻意，抵押方有機會因為借方違約 (Default) 而蒙受額外損失。用戶喺 Euler 有得選擇只存入抵押品而不借出。以Euler 嘅講法，呢啲抵押品係「受保護」。受保護抵押品唔可以用嚟賺利息，但亦都唔會有借款違約嘅風險。
Euler 啱啱12月喺以太坊上線，唔少代幣依然停留喺隔離層等待級數提升。無錯，即使係再高風險嘅代幣，只要喺治理投票入面獲得批准，一樣可以晉級成為跨層級代幣。將資產向上提升層級固然有助於提高資產運用效率，但爆倉風險亦都相對大咗。治理投票只有係$EUL 持有人就可以參與，而治理代幣$EUL 則尚未公佈分配細節。有興趣嘅朋友，記得留意Euler 各個官方頻道，掌握第一手資訊。
鐘意呢篇分享嘅話希望大家畀Like支持下我哋，Subscribe或者Bookmark我哋就可以即時收到更多優惠資訊 / 介紹，有咩問題歡迎留Comments！ 如果想分享 / 更快收到各種優惠著數，歡迎加入我哋港究Telegram討論區。
最新消息，我哋最近仲新增咗多個Kong’s Cult 最新文章Telegram Channel，只要Join Channel，每逢有新文章出爐就會同步收到，勁方便！！唔好漏咗Follow Kong’s Cult嘅 Facebook同Instagram專頁啊！你哋嘅支持同意見絕對係我哋港究專員繼續發掘著數嘅動力，下次見！
