【加密貨幣基礎知識】Defi熊巿農夫 – 流動性掘礦教學

點解DeFi需要用戶提供流動性池？

流動性池 (Liquidity Pool) 係指一池被鎖於智能合約內嘅代幣，用作提供流動性畀用戶進行交易。呢啲流動性池主要被去中心化交易平台 (DEX) 所運用。中心化交易平台 (CEX) 例如 Coinbase 或是 Binance 嘅交易是基於訂單簿模型 (order book model)，買家 / 賣家會各自制定訂單。買家想用最低價買到想要嘅資產，而賣家就想用最高價賣出同一項資產。

因此，交易要成立，買賣雙方必須喺價格上達到共識，如果雙方價格未能達成共識，又或者想買賣嘅幣數量唔夠點算？呢個時候，必須依靠做市商 (market maker)。簡單嚟講，做市商係一個促進交易嘅實體，佢會一直接受買單與賣單，藉此提供流動性 (Liquidity)。因此，用戶可以唔需要等待對手方出現先能進行交易。

但係DeFi世界，為咗去中心化，一般都無機構作為做市商，而衍生出嚟嘅方式，就係利用自動造巿商(Automated Market Maker, AMM) 嚟保持平台流動性。

流動性池係點運作？

一般而言，一個流動性池會有兩種代幣，呢兩種代幣形成一個新嘅交易對市場。例如DAI / ETH 於Uniswap 上嘅流動性。

當一個新嘅流動性池被創建時，第一個流動性提供者 (Liquidity Provider) 會設定池中嘅初始價格，LP 會令池內兩種資產維持相等價值 (50%：50%)。

添加流動性入流動性池後 (可理解為注入資金)，LP 會獲得一個特殊嘅 LP 代幣，代表提供咗多少比例嘅流動性。

交易所收取嘅嘅交易費用 (通常為0.3%) 會按照比例分給所有 LP 代幣持有者。如果 LP 想要抽回他們提供的流動性資金，其所代表的 LP 代幣就必須被銷毀。

每次有 LP 代幣被銷毀，就會根據確定性算法 (Deterministic algorithm) 啟動價格調整，呢個機制就係自動化做市商 (Automated Market Maker, AMM)。

基礎流動性池 (例如Uniswap) 使用恆定乘積做市商算法 (constant product market maker algorithm)：ｘ* y = k，即是x 代幣數量與 y 代幣數量相乘，永遠等於常數 k。正因為算法，代幣比例支配著價格。例如，於DAI / ETH 池子中投入 DAI 買入 ETH，就會造成 ETH 價格上升，而 DAI 價格會下降。

價格移動嘅幅度，則是依據交易嘅大小、池子嘅大小而定。越大嘅池子，就能承受越大嘅交易量，對價格嘅衝擊亦比較小，呢個正係所謂嘅交易滑價 (Slippage)。總之，越大嘅池子就亦可以乘載越大嘅交易，產生嘅滑價比較小，可以帶來更好嘅交易體驗。所以Defi協議平台，一開始會畀 LP 大量獎勵，以吸引流動性，呢個過程就叫做「流動性挖礦」(liquidity mining)。流動性池、自動化做市商嘅概念就係唔需要有中心化嘅訂單簿，亦唔需要有做市商嘅外部支持。

Uniswap 基礎流動性池DEX

流動性資金池係去中心化交易所 (DEX) 主要嘅支柱，如 Uniswap。提供LP嘅用戶會將兩個等值代幣新增至資金池中，以建立一個市場，作為提供資金嘅交換條件，按LP流動性資金中嘅份額賺取交易手續費。其他協議嘅流動性池基於呢個概念再加入一啲變化。

Curve 低滑價穩定交易所

Curve發現 Uniswap 嘅 AMM 機制，用於穩定幣，或是同一種代幣嘅衍生產品 (例如 WETH / SETH)，喺兩種價格相近嘅資產中，運作無咁順利。Curve 池子嘅演算法，係交易呢一類型代幣時，可以提供更低嘅手續費，滑價亦會更低。

Balancer 多種資產LP挖礦

還有另外一種流動性池嘅例子 – Balancer，佢哋發現唔需要將池子裡嘅資產限制為兩種。 Balancer 容許一個池子內可以至多放入八種資產。