專員之前同大家介紹咗咁多張信用卡，咁就為大家簡介吓信用卡小知識啦。普遍大家拎完張新信用卡都只可按銀行 / 發卡行嘅信用限額去簽賬。如果唔小心有突發事要碌爆卡，就極有可能會被發卡公司收費！例如學生哥要交學費、結婚擺酒簽賬等大額支出。
專員就講吓避免被強制爆額手續費嘅常見方法畀大家知啦！
1. 直接入錢落信用卡，當debit卡用
呢個係最簡單直接加大信用額嘅方法，又唔洗通知發卡公司審批，直接入錢落去就搞掂。例如專員有張DBS卡係得HKD100,000信用額，專員想拎嚟訂20部iPhone 13 Pro Max，爆左limit，專員就用轉數快入多HKD20,000去張卡度簽賬，就可以當有HKD120,000嘅信用額去碌，咁當然唔會碌爆卡畀人收錢啦！
2. 申請加大信用額
顧名思義，加大信用卡限額當然可避免碌爆卡，但都會受限於你嘅收入同還款紀錄等資料，因為信用卡限額係會由你嘅月薪去計算，如果要加大信用額當然要搵返發卡公司處理，提供返最新薪金月結單畀佢地再審核。
呢個方法係十分普遍，但專員好少會咁做，怕自己會因為加大信用卡限額而洗大咗！以專員所知，平時發卡公司都會間唔中send email / 打電話去撩客人加大個額，所以有需要嘅讀者都唔洗怕好難先加大到信用額！
3. 暫時加大信用額
專員相信大家會準時還卡數，但人生都係充滿意外同驚喜嘅，當有突發事要加大個信用額又唔想用以上方式去搞，咁可以點做？
專員建議讀者們可以主動打畀銀行或透過手機App申請臨時加大信用額，一般發卡公司都會批暫時加大信額嘅要求而唔需要卡主提供任何證明嘅，前設當然係卡主嘅信貨紀錄良好啦！
但要留意返加大信用額嘅限期，因為發卡公司一般只會為你喺一個時間加大信用額，過咗就會打回原形，所以讀者們都要自己留意返相關通知！專員聽過友人講話發卡銀行試過因為咁收佢手續費，精打細算嘅專員梗係同佢講話可以打去畀信用卡CS waive返啦，到最後都輕鬆waive到🤣。
咁以上方法都係最常用防止碌爆信用額嘅方法，如果之前張卡個信用額太細而又少用，專員都十分建議大家可以重新申請一張信用卡，因為一舉幾得，又可以食迎新、高啲信用額 (讀者們年薪不斷上升
)、信用卡優惠更實用！
優惠受條款及細則約束，資料只供參考，詳情請參閱相關發卡公司網頁。
借定唔借？還得到先好借！
關於今次嘅分享暫時到呢度，Kong’s Cult會繼續搜羅更多優惠。如果想了解更多信用卡資訊歡迎睇睇Kong’s Cult信用卡專頁。
如果想睇吓我哋其他熱門文章，歡迎撳下邊嘅link睇睇：
鐘意呢篇分享嘅話希望大家畀Like支持下我哋，Subscribe或者Bookmark我哋就可以即時收到更多優惠資訊 / 介紹，有咩問題歡迎留Comments！
如果想分享 / 更快收到各種優惠著數，歡迎加入我哋港究Telegram討論區。最新消息，我哋最近仲新增咗多個Kong’s Cult 最新文章Telegram Channel，只要Join Channel，每逢有新文章出爐就會同步收到，勁方便！！唔好漏咗Follow Kong’s Cult嘅Facebook同Instagram專頁啊！你哋嘅支持同意見絕對係我哋港究專員繼續發掘著數嘅動力，下次見！
